La esperiencia del club de llectura n’asturianu n’Uviéu y el panorama xeneral

Esti cursu entamó la primer esperiencia d’un club de llectura de llibros n’asturianu n’Uviéu. Como coordinador del mesmu, nun puedo facer un balance más que positivu. Tuvimos bonos númberos de participación, que fueron creciendo adulces a lo llargo del cursu. Yera la primer vegada que s’impulsaba un grupu d’esti tipu dende les instituciones públiques d’Uviéu, col curtiu precedente, en 2016, del qu’entamara Iniciativa pol Asturianu nel Pub Corner’s de la capital asturiana.

Nun ye fácil arrancar con una esperiencia como esta nuna ciudá onde prácticamente yera una iniciativa inédita. La respuesta foi, sicasí, d’interés per parte del públicu llector, demostrando que, cuando se pon en marcha daqué asina, la sociedá respuende.

A lo llargo de les sesiones d’esti añu lleimos sobremanera narrativa como puntu central del club de llectura, pero una de les idees que desenvolvimos ye la d’aprovechar cada sesión p’averanos tamién a la poesía, con un pequeñu tiempu dedicáu a la llectura de poemes y al comentariu, bien alredor d’un autor o autora, bien alredor d’una antoloxía. Tuvimos asina tiempu p’averanos a un xéneru que munches vegaes ye más malo de facer llegar a los llectores, inclusive cuando son avezaos pero tán centraos namás na narrativa.

Una de les grandes ventayes de facer un grupu de llectura n’asturianu ye la cercanía de los autores a les hestories que nos cunten y a los llugares onde asoceden. Per otru llau, tener a los propios escritores cerca danos la oportunidá de que tolos autores a los que lleímos pudieren pasar pel club de llectura.

Ye preciso agradecer l’arrogancia de los y les escritores que pasaron pel espaciu. Tuvimos a Pilar Arnaldo, Sidoro Villa, Berta Piñán, Pablo Rodríguez Medina y María Esther García López. Hubo amás tiempu pa lleer, anque por desgracia nun pudimos tenelu ente nós, a Xuan Bello, del que lleimos Hestoria universal de Paniceiros. Quixo ser el nuesu pequeñu homenaxe al autor, que nos dexaba fai agora cuasi un añu.

El club de llectura n’asturianu ye una oportunidá pa persones que falen asturianu nel so día a día y busquen tener espacios de sociabilización, pa persones que tán deprendiendo y pa otres que, sabiendo asturianu, quieren averase per primer vegada a la llectura nesti idioma y atopar un sofitu nel grupu. Un espaciu variáu, entreteníu y útil.

Bona señal ye que la lliteratura asturiana tenga cada vegada más clubes de llectura. Agora mesmo tán funcionando los de Corvera, Ribeseya, Mieres, Comarca de la Sidra y Uviéu, amás de los munchos otros entamaos polos profesores de llingua asturiana en colexos ya institutos. Amás, tamién en grupos onde nun lleen esclusivamente n’asturianu lleen dacuando tamién nesta llingua.

Ye necesario que s’aproveche el bon momentu de la lliteratura asturiana, tanto en creación como en divulgación, pa que les instituciones públiques, l’asociacionismu y tou aquel que pueda pongan en marcha clubes de llectura en diferentes puntos d’Asturies. Nesti oxetivu, les biblioteques públiques tienen de tener un papel relevante. Si se ponen en marcha, si se sofiten, si se da la oportunidá, ta demostrao qu’estos grupos funcionen y ayuden a fomentar la llectura n’asturianu, a dar a conocer a los nuesos autores y a xenerar espacios onde la llingua asturiana ye vehicular.

Una de les idees que podríen ser interesantes, agora qu’esiste esta rede de grupos de llectura, ye la posibilidá de facer dalgún tipu d’alcuentru ente los mesmos, como se fai cuantayá ente los clubes de les biblioteques asturianes. Sedría una manera de premiar esa actividá y de fomentar l’alcuentru ente los llectores y los escritores. Asina que, citando al otru, pero con meyores intenciones: quien pueda facer, que faiga.