Enedina planta cara
– Imaxino que yes una d’eses voces que tan carcomiendo la mio cabeza. Tú y los tus compañeros de folixa – dixo Enedina.
El altu vestíu de negro nun dexaba de sonreí-y d’aquella manera, pero más que miéu, a ella taba dando-y curiosidad. Pasara tantes coses nos años que llevaba vivío, que lo que más-y prestaba del mundo, yera quedase mirando a los demás, manque yera también lo único que podía prestá-y. La vida n’aquella residencia nun-y permitía otres distracciones.
-Non Enedina, non – faló el que taba a les sos espaldes arrimándose seliquino a ella.- Delles veces, arrastramos con nos les remembrances que más marca nos dexaron na vida y …
Enedina dexólu con la palabra na boca. Taba empezando a tar fartuca de tanta parpayuela. Gustaba de charrar un poco, pero les nueches yeren pa dos coses, y la única que quería facer nesos momentos yera dormir.
-¿Vas ser parte de les nueces voces? – Dixo el calvu demientres ella colaba por aquel pasillu.
-Mira, vidina – entamo a decí-y ella.- Nun cantaba nin cuando taba obligada naquel colexu monxes.
L’home altu quedó mirando pa ella y, de xutrucu, entamó a soltar carcaxaes. Reíase tanto, que tuvo que quitar les gafes y llimpiar les llárimes que-y percorríen la cara.
-Enedina, fae tiempo abondo que vemos xente pasar por estos llares, pero de toos ellos, yes la única que me fizo reíme.
-¿Llames a eso reíte? – Retrucó ella averándose al paisanu, sacando una mala hostia de la que nun ficiera gala nos últimos cincuenta años.
El calvu, viendo a aquella paisana erizarse como un gatu, reculó unos pasinos y quedó mirando pal otru, sin tener muy claro que ye lo que diba facer.
-¿Quies que t’enseñe yo lo que ye reite?
