Tener una Academia de la Llingua Asturiana foi un suañu vieyu pa los asturianos y asturianes esmolecíos pola cultura del país. Yá Gaspar Melchor de Xovellanos, ilustráu xixonés, fai la primer propuesta alredor de 1791. En 1878 sedrá Gumersindo Laverde quien va volver a plantegar la necesidá del establecimientu d’una academia asturiana. Pero nun va ser hasta l’añu 1919 que cristalice una propuesta concreta, y Xixón va ser el llugar escoyíu pa establecela. Xixón yera’l centru del asturianismu creciente que se vivía nes primeres décades del sieglu XX n’Asturies, con especial atención pa la poesía, el teatru y los estudios sobre’l propiu idioma.

El 10 de febreru de 1919 l’escritor xixonés Fabricio y otres figures del momentu aconceyen col propósitu de crear una Academia Asturiana. Dende una bien potente diversidá ideolóxica, xunto a autores como Calixto Rato y Roces, conservador, o Pachín de Melás o Pin de Pría, de corrientes socilistes y federalistes, ponen en marcha, la Real Academia Asturiana de Artes y Letras. Esta primer Academia Asturiana ñaz con un importante pluralismu ideolóxicu, con escritores venceyaos a ideoloxíes estremaes, dende la drecha a la izquierda, demostrando una tresversalidá del movimientu, con socialistes o federalistes como los yá citaos y una mayoría, eso sí, de miembros católicos y conservadores. L’Academia tien bien nidios los sos oxetivos, ente los que tán la normativización del asturianu, espresada por ún de los sos miembros fundadores, el que fadrá de bibliotecariu-archiveru, Páchu’l Péritu, d’una forma tan clara como quiciabes inxenua, pola dificultá de la xera plantegada y la probitú de los medios colos que cuentaben: «El problema lingüístico del bable lo vamos a ventilar nosotros en la Academia Asturiana, fijando sus leyes gramáticales y fonéticas, regularizando sus apóstrofes y afijos, su ortografía y prosodia y señalando su origen etnográfico; cultivando preferentemente el bable clásico central, depurado de voces extrañas y subdialectos que le afean» (González Prieto, 1921).

Esta Academia apaez nun momentu de rexurdir de la identidá asturiana, como demuestren l’apaición d’otres entidaes nestos años, como l’Ateneo Asturianista en 1922 (González Delgado, 2001: 19) y el Centro de Estudios Asturianos, creáu en 1920 n’Uviéu con unos oxetivos muncho menos centraos no llingüístico, con un conceptu más pluridisciplinar, pero tamién centráu nel estudiu de tolo que cinca a Asturies. La fundación de l’Academia tresciende y ye recibida como una bona noticia fuera d’Asturies. Lluís Cebrian i Ibor asoleya un artículu tituláu «Hacia la liberación de Asturias»^[1], n’agostu de 1920 en La correspondencia de Valencia. Nel testu celebra l’apaición d’iniciatives como’l llibru La doctrina asturianista o la fundación de la Junta Regionalista del Principado, y sobre l’Academia opina: «[…] Pero ahora, cumpliendo con su esencialidad nacionalista, pues no otra cosa representan las vivas ansias de crear una cultura propia, se halla en vías de fundación una “Academia Asturias de Artes y Ciencias”, en la renombrada ciudad de Xixón.  También corrobora en nuestro aserto el notable cultivo que alcanza en nuestros días el olvidado y maltrecho bable, preciosa joya de un ayer repleto de glorias y santas libertades, que eternamente han de hacer latir el alma de la famosa Asturias […]». Joaquín A. Bonet danos anuncia de más detalles de l’actividá de la Real Academia Asturiana nun artículu asoleyáu n’El Comercio en 1962^[2]. Los conceyos de l’Academia celebrábense nuna de les aules baxes del Institutu Xovellanos de Xixón.

Otra de les novedaes d’esta Academia, que la convierten en pionera de les academies de llingües n’Europa, ye la presencia de muyeres dientro de la institución, anque dientro del denomáu «grupu femenín», lo que nun dexa de ser amuesa de la importantre presencia de muyeres nel ámbitu de la llingua asturiana, con pioneres en toles dómines y xeres. Casu de Xosefa Xovellanos, yá presente na primer antoloxía de la llingua asturiana, la de Caveda y Nava de 1839, o d’EnriquetaGonzálezRubín, como primer novelista de la lliteratura asturiana nel sieglu XIX. Entá más chocante ye la presencia de muyeres nesta primer academia de la llingua asturiana, que nos fala d’un ambiente progresista n’Asturies d’aquellos años, si facemos comparanza cola incorporación de la muyer a otres academies de la nuesa rodiada. La Real Academia Española, por exemplu, nun inclúi a una muyer, la poeta Carmen Conde, hasta 1978. Nel Institut d’Estudis Catalans, Aurea Javierre Mur va ingresar en 1966^[3] como primer muyer miembru correspondiente de la entidá. Nel casu de la Real Academia Galega la primer muyer foi la escritora Francisca Herrera Garrido, nomada en 1945, anque nun tuvo tiempu a tomar posesión. En 1986 l’archivera Olga Gallego Domínguez foi la primera en facelo dafechu. La Real Academia de la Lengua Vasca – Euskaltzaindia, fundada en 1918, un añu enantes que l’academia asturiana, nun acoyó a una muyer, Miren Azkarate, hasta 1983. L’Académie française, fundada ente 1634 y 1635, tardó hasta marzu de 1980 en nomar a una muyer ente los sos miembros: Marguerite Yourcenar.

Tornando al llistáu de miembros de l’Academia de 1919, especialmente llamativa ye la presencia de María Luisa Castellanos (Llanes, 1892 – Méxicu, 1974), la que ta considerada como la primer sufraxista asturiana. Ñacida en Llanes en 1892, morrió nel exiliu mexicanu en 1974. Foi una muyer comprometida col feminismu y cola República, razón del so exiliu. Con menos de trenta años yera yá miembru de l’Academia. Apaez tamién Consuelo Cienfuegos Xovellanos y Bernaldo de Quirós (1875?-19??), que sigue de dalguna manera la tradición asturianista de la familia Xovellanos. Yá en 1891^[4] ye la Reina de los Xuegos Florales na fiesta d’inauguración de la estatua al so antepasáu Gaspar Melchor de Xovellanos en Xixón. Ellí entrega los premios de los Xuegos Florales a dellos escritores n’asturianu: Calixto Rato y Roces, col que dempués compartiría espaciu na Academia, Teodoro Cuesta y Bernardo Acevedo y Huelves. La tercer muyer qu’apaez entes les académiques ye Eva Canel (Cuaña, 1857 – L’Habana, 1932), que  vivía fuera d’Asturies, probablemente en Buenos Aires nel momentu de fundación de l’Academia. Periodista y escritora, fundó periódicos y revistes ellí onde tuvo. Falante d’eonaviegu, fai unes interesantes reflexones sobre l’idioma del Eo-Navia nel artículu Asturias acaba en el Nalón^[5], nel que critica estes pallabres d’Alejandro Pidal y Mon.

Sobre l’Academia sabemos pel momentu que siguió la so actividá hasta, pelo menos, 1921. La dictadura de Primo de Rivera y la de Franco dempués diben impedir la so continuidá. Sabemos, gracies a LucianoCastañón^[6] que Fabricio siguía entá en 1943, en plena dictadura, faciendo xestiones pa tratar de volver a ponela en funcionamientu. La particiación na fundación del Instituto de Estudios Asturianos (IDEA) en 1945, como órganu controláu pol réxime franquista, va ser l’alternativa posible.

Entá queda abondo por saber de la hestoria d’esta institución que nun va tener un continuador claru del so llabor hasta dempués de la dictadura franquista, cola fundación, o podemos dicir refundación considerándola heriede de la so actividá, de l’Academia de la Llingua Asturiana en 1980-1981.

BIBLIOGRAFÍA

 Alas Argüelles, Leopoldo (1924): «Nuestro propósito», en Boletín del Centro de Estudios Asturianos 1: I 3-6.

Galán, Inaciu (2021): ¡Volved las manos al bable! La llingua asturiana nel Franquismu. Uviéu, Ediciones Trabe. [en preparación]

García Arias, Xosé Lluis (1975): Bable y regionalismo. Uviéu, Conceyu Bable.

González Delgado, Ramiro (2001): Obra completa de Pachín de Melás. Uviéu, Trabe.

González García, Fabricio (dir.) (2001) El Regionalista Astur: edición facsimilar de los númberos 1 al 14 del peródicu asoleyáu en Xixón en 1919 dirixíu por Fabriciano González. Uviéu, Academia de la Llingua Asturiana.

González Prieto, Francisco [Pachu’l Péritu] (1921): La Vida Asturiana n’un cientu de Sonetos. Xixón.

Ramos Corrada, Miguel (coord.) (2002): Historia de la Lliteratura Asturiana. Uviéu, Academia de la Llingua Asturiana.

NOTES

^[1] Hacia la liberación de Asturias –  Lluís Cebrian i Ibor – La correspondencia de Valencia: diario de noticias: eco imparcial de la opinión y de la prensa: Añu XLIII Númberu 18168 – 09/08/1920: páx. 1.

^[2] «Pequeñas historias de Gijón. Humor y cultura de los años veinte», El Comercio, 14/01/1962: páx. 5.

^[3] https://www.iec.cat/activitats/noticiasencera.asp?id_noticies=3020 [Consulta a 26 de xunetu de 2021]

^[4] Según información d’El Comercio, 14 d’ochobre de 1991: páx. 18-19.

^[5] Asoleyáu na revista Asturias, de L’Habana, y reproducíu pol periódicu Castropol, el 10 de payares de 1916.

^[6] «Una Academia Asturiana de Artes y Letras en Gijón», El Comercio, 29/11/1980: páx. 27.