Dellos lliteratos y lliterates aporten a la pluma dempués d’una maleta enllena de llectures. Nel mio casu sedría una verdá a medies, porque enantes de garrar el bolígrafu yo lleía, pero non lletres ensin imaxe.

Cuando yera pequeña tarrecía lleer, nun acababa yo de tener esa conexón ancestral que tienen delles persones pa cola lliteratura, y por más que mio madre lo intentaba los llibros y yo nun yéremos compatibles; lo mío yeren les series de dibuxos animaos y  sentame hores delantre d’un foliu y imaxinar colos llápices de colorinos. Foi por esto qu’en dalgún momentu apaecieron delantre min los cómic manga, y nellos atopé histories qu’entá güei relleo y esfruto.

Al empar que yo lleía y almiraba aquelles viñetes, entamé a facer cuentinos curtios pa la escuela, y paez que prestaben a la xente. Nun yeren a creyer cuando dicía que yo nun yera una neña llectora de llibros, sinón de cómic. Quiero pensar que yeren otros tiempos.

En dalgún momentu del casi entamu de la adolescencia averéme por fin a los llibros, y como yera d’esperar foi a la fantasía y a la ciencia ficción. Yera naquellos momentos nos que yo duldaba si la meyor forma d’espresame yera’l dibuxu o la lletra, y por cuestiones de la vida foi lo segundo. Con quince años tuvi un conatu de novela, qu’una profesora de llingua castellana lleo (entá nun sé como foi capaz la probe). Entá la guardo pa ver cómo entamé. Tamién fici munchos rellatos que colos años camudaron a novela.

Tres d’un parón polos estudios, finé la mio primer novela, que naquella primer versión yera de calidá cuestionable, y dempués, cola cuarentena y el tener que tar en casa ensin salir, tuvi tiempu a sentame delantre del ordenador y retomar cola calma aquello que tanto me prestaba.