Ígor Medio y ‘La familia Castañón’
Norman Fernández y Ruma Barbero
2021-07-12
Nacíu en Xixón en 1972, Ígor Medio Tuya foi un creador al que la etiqueta de multidisciplinar podía aplicáse-y en tol so sentíu. Sicasí, les sos prometedores trayectories profesionales viéronse tempranamente atayaes pol so fallecimientu nun accidente de tráficu en 2006. En 1990 formó parte, xunto al tamién xixonés Ruma Barbero, del grupu d’alumnos de Belles Artes de Salamanca que daría llugar al grupu musical Felpeyu, nel qu’Ígor, amás de la voz principal, encargábase de composiciones, arreglos, y tocaba guitarra, mandolina y buzuki. Paralelamente a la so faceta como músicu, Ígor desendolcó una importante actividá nos campos de la historieta, la ilustración y l’humor gráfico, na que la so creación más notable foi la tira diaria La familia Castañón.
Creación emblemática del humor gráficu asturianu, La familia Castañón, tira diaria que Ígor fexo pal periódicu La Nueva España mientres los periodos branizos ente 1997 y 2005, ta compuesta por un neñu, la so hermana adolescente, los sos padres y el peculiar güelu (aficionáu a cantar tonada a les 4 de la mañana o a tocar la gaita nel patiu de vecinos ensin previu avisu); personaxes al traviés de los qu’Ígor Medio consiguió esplegar un axilosu, afiláu y certeru sentíu del humor, con una importante carga crítica. Too ello ellaborao por aciu lo que paecía ser un talentu innatu pal gag visual, el diseñu de personaxes y un brillante y personal usu de les onomatopeyes.
Bona parte de la producción de la serie foi atropada pol mesmu Ígor Medio nel llibru Too Castañón. 1997-2004, nel qu’amás de recoyer tolo apaecío nesi tiempu, apurría testos sobro la creación de la serie y comentarios sobro los rellabicos de la realización de delles de les tires. La edición qu’agora se presenta va caltien intactu tol conteníu d’aquel volume, que va vese ampliáu poles tires apaecíes nel añu 2005 y coles qu’Ígor tenía adelantaes pa la campaña del añu 2006 y que permanecen inédites hasta’l momentu.