A Victor Lima conocílu nel aeropuertu, onde m’esperaba detrás d’un cartel col mio nome.  Tardé en reparar en que seguramente aquel nome vagamente hispanu nun yera’l de verdá. Él y Ozzy tuvieren xuntos en Corea y conservaren aquelles maneres de llamase poles iniciales, col alfabetu esi qu’usen los pilotos.

A Ozzy, del que tampoco tuvi constancia del nome verdaderu, conociéralu nun tuguriu de Nueva York. Prestába-y andar ente los beatnicks y falar de filosofíes orientales qu’una mocina de 21 años llegada d’un caseríu d’Iowa –blanca, roxa y protestante que nun había más pa onde- sonáben-y a otru planeta. Ozzy vistía de negro y paecía l’amu de cada cuartu nel qu’entraba.

Cuando-y dixi qu’estudiaba arte y que quería ser pintora dixo:

—¿Préstate’l mar? Conozo yo un sitiu onde ente l’agua y el cielu hai más de diez tonos d’azul y verde. ¿Quedríes venir?

Yo del mar namás conocía l’agua opaco del puertu de Nueva York y, como lo más aproximao, les llanaes interminables de maizales de la mio tierra.

—Poles perres nun te preocupes. Ellí nun hai casi onde gastar, puedes vivir como una Eva nun Paraísu nuevu, primero del pecáu.

Un mes más tarde tenía en casa dos billetes d’avión: Nueva York –Madrid. Madrid-Ibiza.

Lo que me contó, ser, yera verdá. Pero a les dos selmanes de llegar, cuando-y pidí si me podía conseguir materiales de pintura pa intentar capturar aquella maraviya, díxome:

—Á Pema— al llegar yá me cambiara’l nome pol de la flor de loto—, ¿nun te val colo que ven los tos güeyos? ¿En verdá crees que les tos manes van aportar dalgo a la obra de la Madre Naturaleza? Paezme qu’eso nun ye namás qu’ego que t’amarra a la tierra.

Aquella nueche mandóme poneme a cuatro pates y fundir la cara na almuada de seda.

Victor Lima —dos metros, unos 120 kilos, cabeza rapada, acentu de Little Italy— andaba siempre con nosotres, menos cuando pagaba a dalgún rapaz del pueblu pa que quedare curiándonos y nos dexaba soles en casa pa baxar a la ciudá a tomar dalgo y «relaxar». Baxaba tres de nosotres a la playa y quedaba sentáu nes roques, nun se bañaba nin se desvistía. Tampoco miraba pa nós. A lo primero pensaba que yera por llealtá a Ozzy, cosa que me facía gracia, porque m’abultaba atrasao y impropio de la nueva era que tábemos viviendo

Ozzy diba y venía a temporaes pero Victor ocupaba permanentemente’l cuartu d’al llau d’él naquella casa blanca que dominaba un cantil per onde se baxaba  a una playina onde cabíen tolos colores del mundu. Nosotres durmíemos nun cuartu grande, les cuatro que yéremos, en colchones puestos en suelu con colches de la India. Ozzy dixéranos que nun lleváremos equipaxe.

—¿Pa qué? La ropa esto de Nueva York nun val pa ellí y ye una cosa más que t’amarra al mundu capitalista desalmáu del qu’escapamos.

Al llegar, ensin equipaxe, como m’encamentara, diome un par de vistíos blancos de llinu iguales que los que teníen les otres trés moces que yá vivíen ellí, y tuvo hores falándome del ego, de que l’apegu hacia lo material ye lo qu’impide que la to alma alce’l vuelu y de que cuanto meyor ye pal karma andar en carnes, que nun dexara que la mio educación puritana m’alloñare del Nirvana. L’airín cálidu del Mediterraneu y el fumu de la marihuana dába-y la razón.

Aquella temporada foi tranquila y prestosa. Depués de les primeres selmanes de quemadures, la mio piel garró un color doráu desconocíu. Bañándome desnuda coles mios “compañeres” na playa sentía una lliberación de tolo que nos enseñaren. Meditábemos a la solombra de los pinares y compartíemos la comida que nos traíen los llabradores de la zona, pagada con billetes estraños pa mi que Victor Lima sacaba del bolsu del pantalón. Tampoco faltaba la grifa nin un licor que golía igual que los praos d’aquella isla. A la tarde, Ozzy llamábanos a una o a otra pa que fuéremos al cuartu d’él y les demás tocaben instrumentos de percusión qu’había pela casa, o facíen adornos con flores seques y conches de la mar.

En llegando’l mes de Payares la cosa cambió. Ozzy enteróse que Shanti y Dharma (nunca supi’l nome d’aquelles moces tan roxes como yo qu’Ozzy traxera de dalgún país del norte ye que namás falaben ente elles una llingua malpenes comprensible pa mi) llamaran a la familia dende’l bar del pueblu. L’ambiente na casa cambió dafechu, muncho más cuando n’avientu llegó per ellí l’hermanu de Dharma y un señor español,  entraxetaos los dos, con dos policíes de los que llevaben sombreros negros de charol, y les llevaron de bona gana d’ellí.

En xineru Victor acompañó a Nirvana (Jane) a Londres pa qu’albortara, nun sé si por ser ella inglesa o porque yera’l sitiu más cercanu pa operaciones d’aquella triba, más p’allá de ponese en manes de dalguna paisana d’aquelles de pañuelu y mandil negru que falaben tan poco español como nosotros. Volvieron. Jane confirmóme que a Victor nun había manera de camelalu y non por llealtá nenguna: como sospechábemos (nosotres y la xente de la isla) les muyeres pa él nun yeren nin oxetos pa mirar. Pasémos dos meses con munchu fríu naquella casa que malpenes tenía una chimenea, calentando per dientro con aquel llicor dulcino.

Ozzy llegó cola primavera, del brazu de dos moces morenes, una española y otra italiana, tan encantaes como tuviere yo l’otru añu. Jane y yo nun teníemos familia a quien llamar.

Un día, a Victor Lima cayó-y el faxu de billetes del bolsu d’atrás y pude devolve-ylu ensin que sospechare que faltaben un par de billetes de la parte de dientro. Un día que Victor volvió a marchar pa una selmana con una de les moces morenes, Jane y yo consiguimos, con ún de los billetes y llevantando los vistíos, que’l mozu que nos curiaba nos dexare baxar al bar del pueblu, que tenía teléfonu y un llistín onde veníen les axencies del viaxes de la ciudá. Nuna d’elles dimos con una que falaba inglés y que nos dicía que les perres que nos quedaben daben pa un billete de barcu a la península. Jane y yo lloremos d’alegría, ensin pensar qu’ellí tampoco teníemos familia, nin amigos, nin sabíemos l’idioma, y que díbemos llegar ensin nada más que los vistíos que lleváremos puestos y que seguramente tendríemos que quitar pronto. Fícimonos entender con un taxista d’ellí pa que nos fuere a buscar al otru día a la casa del cantil a tiempu pa llegar al últimu ferry. Paguémos por adelantao.

A les ocho, sentimos el rumor d’un coche subiendo pel camín de tierra. Jane y yo garrémonos de la mano y salimos corriendo al portón. Ellí taba’l taxista del día enantes pero’l coche nun taba vacíu como esperábemos. Pela puerta d’atrás vimos posase a Victor Lima, que ponía pela ventaniella al conductor munchos más billetes de los que costaba una carrera al puertu.  Depués quedó paráu enfrente de nosotres, calláu, engrifáu y señalónos la puerta de la casa colos güeyos. El taxi arrancó y marchó, empañando l’atardecer cola polvoreda que llevantaba.