¿Pa qué sirve un club de llectura?
La rempuesta pue paecer evidente, pero nun m’abulta que lo seya. De primeres ye fácil, asina y al primer bote: un club sirve pa poner en común unes llectures determinaes. Esa sedría la rempuesta aséptica… Pero la realidá, como cuasi siempres ye abondo más complexa. Dende fai dellos años (pocos, nun va tanto) entamaron a apaecer clubes de llectura de lliteratura n’asturianu. Creo que’l primeru foi’l de Mieres y detrás, adulces foron apaeciendo más; munchos d’ellos venceyaos a los Servicios de Normalización. Güei tenemos clubes nos conceyos de Colunga, Ribeseya, Villaviciosa, Nava, Xixón, Uviéu, Mieres y Corvera. Pudiera ser que dalgún nos quedara atrás.
La Direición Xeneral de Política Llingüística decidió echar una mano a esta faza del procesu de normalización apurriendo una biblioteca que cuenta con exemplares abondos pa cubrir les necesidaes d’estos clubes. L’accesu a esti fondu ye gratuitu, lo qu’acabó de dar un bon emburrión a esti tipu d’asociaciones. El fondu bibliográficu va aumentando tolos años, lo que permite tener llectures nueves, sobre too pa los clubes que lleven años na xera. Pero dempués d’amosar el niciu y desendolcu d’esta realidá, vamos a la pregunta: ¿Pa qué sirven?
La rempuesta cenciella ye la que dimos enantes, pero como yá diximos, la realidá ye muncho más complexa, porque sirven pa munches más coses. Podríamos entamar falando de los beneficios d’esta triba de xeres en cualesquier llingua como puen ser: el desendolcu personal y cognitivu que permite la llectura, favoreciendo l’hábitu llector, ampliando la visión de la realidá na que vivimos al conocer otros puntos de vista sobre la mesma llectura, ameyoramientu de la comunicación oral y escrita, ampliación de la rede de contautos personales, etcétera, etcétera… Pero ye qu’amás de tener los mesmos beneficios qu’un club de llectura en cualesquier llingua, sirven pa poder atrayer a la lliteratura asturiana a un públicu que d’otra manera ye fácil que nun consumieran esti tipu de lliteratura, por estremaos motivos.
La captación d’esti tipu de llector dase nun momentu nel que gran parte de los potenciales llectores ta escolarizao n’asturianu, cosa que fai años nun pasaba, los falantes d’asturianu yeren analfabetos funcionales. Esa escolarización permite tener una base sobre la que trabayar. Dicía l’escritor Antón García fai munchos años que lo bono que tenía escribir n’asturianu yera que cuasi conocíes a tolos tos llectores. Güei, esti panorama camudó abondo y yá nun ye tan fácil conocer a un gran porcentaxe. Per otru llau, permiten averase a esta lliteratura a falantes nativos que nun tán escolarizaos qu’al ver la iniciativa y xente de la so edá nella, anímense a somorguiase nesti mundu nuevu pa ellos.
