Nestos díes últimos de la Selmana Negra 2021 tuvo apaeciendo una ilustración alredor de los escritos que dexó la sección A baxamar too apaez. Agora, tando esti guapu eventu a piques de terminar, y como s’oi dacuando nos cantares tradicionales, voi tener l’atrevimientu de dicir que, al meyor, dalgún de vós tuvo remando escontra la tinta d’esa ilustración tentando de da-y un sentíu. El sentíu d’una obra ye dalgo que prefiero dexar a cuenta del espectador, pero, teniendo en cuenta qu’escribo col rotulador metafóricu qu’entintó’l papel d’esi dibuxu y que della xente me pidió LA DESPLICACIÓN, dalgo vos podré comentar.

Tuvi una vez un alumnu de Zreicéu del Bisuyu que me dio l’acepción necesaria pa entender el valir d’un bardial. El bardonal ye’l símbolu más puru del abandonu, lo que fai la naturaleza col terrén cuchao de vieyo pero pal que yá nun s’atiende. Ye un hábitat liminal, qu’ocupa l’espaciu que dexa de ser útil y que queda curiando de la tierra hasta que vuelva la gadaña camudada en desbrozadora. El bardón ye’l reflexu natural énte l’horror vacui, una planta carnívora pasiva según Attenborough, el resultáu de l’asociacionismu ente’l pinchu, l’artu y el matu, l’abellugu los tordos. Y con too y con eso, díxome’l neñu preadolescente, qu’él, al bardéu, nun-y dicía lo de tar a monte. «El bardéu ye ermo», dixo cola fuerza del golpe secu de la brisca que sabe que va llevar la baza. El bardoneiru nun produz. Pa él, ente’l bardiu y el cementu nun hai diferencia, sírve-y pa lo mesmo, sirven pa nun semar.

Sicasí, aínda fuimos quien a conquistar el bardayu ensin la bondá estética de desanicialo, pero añadímos-y un detallín, el palé, lo más paecío que tenemos a un matu propiu. La madera dominao del palé ye sebe qu’impide’l pasu de nueso. Apruz per tolos llaos onde tien habida una carga de valir, seique n’especial onde yá nun se tiza. Nun tien qu’estrañar, entós, esi protagonismu del palé. Ye, lliteralmente, la base de la nuesa vida. Yá lo diz mio güelu: «Si nun vien nun palé nun tien valía» (mientres fai un xestu de surniar los mocos a la imaxe inimaxinable de dalgo que nun venga en formatu palé)­­. Valía que, per otru llau, desapaez tres  la descarga. Y, hala, «déxalu ehí na esquina, yá lu pañará EMULSA». Debe ser esi’l nome que se-y da al bardanal en Xixón. A esi palé de palés namás que-y queda aguardar pola yedra y el matu, que lu escuendan hasta que la llata sude’l ferruñu de los clavos qu’aguarden a abrir la mancadura. Porque una vez que posa’l ferruñu yá nun acabes con él. Ye un andanciu. Namás que queda deprender a convivir con él y rezar porque nun acabe cola ferralla importante, nun vaya ser qu’entorne la noria y acabe cola verbena.

Nesti añu últimu tienen pasao delles coses, pero, pa min, verdaderamente, foi l’añu del bardu y l’añu de la mio querencia por entendelu y por domalu. Esfrutó de que nun lu esmocharen y pudo esplayase. Acatañó escalera, paré, poste arriba y señaló lo feble, lo cuestionable. Aceleró’l podrecer de la madera olvidao, tumbó llinies, trespasó muries, foi estandarte d’un empiezu nuevu, catalizador de la nueva normalidá y, magar del arranque, viose detenío pol cable que xira, pol rotativu naranxa qu’imprime l’orde del bon facer. A la fin, la historia escríbela y depriéndela la clase cola meyor desbrozadora y la fábrica de palés más grande.

Vendrán más barderos, non tan bien acompañaos como tuvo’l de mio esta selmana, pémeque.