Una ramina de romeru

* * * * *
Primera entrega del rellatu per capítulos ‘Enedina a medianueche’, fechu poles y polos autores de Radagast.

* * * * *

Enedina taba fartuca de la so compañera. Nun yera mala persona, al revés; a la hora de xugar a la brisca, siempre se dexaba ganar; cuando repartíen les galletes de la merienda y ella-y robaba unes cuantes, nunca se quexaba. Como si nun se decatara, como si se ficiera la tonta de tanto facese la tonta y la inocente. Yera unos años mayor qu’ella, pero na residencia eso nun importaba. Sacantes si teníes 70 años. Los 70 años yeren los nuevos 20. Dios, qué ascu-y daba esa xente, coles caderes casi intactes.

Con too, Enedina facía una temporada que nun yera a dormir bien. Una tarde, de paséu cola sobrina, intentaran vende-y una rama de romeru. Nun lo mercó, ¿pa qué? Si teníen una mata bien grande d’ello nel xardín. Pero la muyer echó un maldicir y, al poco, ella trestornó. Despertaba muncho, tenía secañu y, a la de llevantase, facíalo como si viniera de correr un trail. Dempués entamaron les voces. Primero paecíen xuxurios; a la selmana yera como gusmiar una conversación na mesa d’al llau. Pensó que podía ser la nueva medicación del sintrón. Pero s’asustó daveres cuando les voces entamaron a falar con ella. Solo de nueche, el restu del día nun pasaba nada. Mientres suañaba, yera quién de retrucar y tener conversaciones enteres, anque solo fuera por convencer de que la dexaran planchar la oreya, qu’al día siguiente, sinón, diba pitar el tensiómetru.

Cuando entamaron a metese cola compañera, atravesó. Elles llevábense bien, cola resignación de quien comparte destín y cuartu, pero les voces multiplicaben les zunes. Desquiciaba más cuando tardaba en calcular pa la partida, si surbía la sopa, cuando garraba les sos zapatielles por despiste.
Una nueche, les voces dixeron-y qu’había que quitala d’en medio. Y nun discutió. Garró l’almuada.

Continuará…