[Ilustración de Marcos Martínez (@indelendo)]

D’ente les estremaes funciones que da en cumplir la lliteratura, la lúdica mándase como la más afayadiza pa referise a la que desendolca la novela policiaca. Dende’l puntu de vista del escritor, la novela plantégase como tableru; los personaxes son peones; los fechos resulten les acciones y los movimientos. Nun hai qu’amenorgar la seriedá de lo lúdico, en tanto que tamién la ruleta rusa, por exemplu, ye un xuegu; la función lúdica de la novela policiaca rescampla entendiendo esta nel sen d’un xuegu d’inxeniu (con tolo que la pallabra inxeniu conlleva) nel que’l llector tien qu’aldovinar, a partir de la mesma información cola que cuenta’l detective, la resolución del casu que se plantega.

Eses son les riegles coles que se xuega, y con eses blimes han componese los cestos.

El llector ye una triba de Bustos Domecq enciarráu non nuna celda a la que-y vienen cola esposición y amuesa de la información; pela cueta, la persona que llee y se somorguia na esposición del casu failo tranquila, en casa, sentada, quiciabes, como’l llector cortazarianu de continuidá de los parques, ayenu a una realidá que se vuelve sobre sigo.

Cuido que parte del éxitu d’esti tipu de lliteratura, que llegó a ser de mases, xunto cola nomada novela rosa o les noveles del oeste, reside xusto nesti calter o función lúdica na que’l llector ye quien a tomar parte activa recreando, colos datos que se van ufriendo, el posible relatu de los fechos. Esti ye un elementu d’esti tipu de lliteratura de consumu que les otres noveles (de calter más escapista) nun traen nel so ADN de xéneru lliterariu. Y, como dicíemos, convenía desconfiar del calter connotativu de la pallabra lúdico, porque ye esti xéneru, el policiacu, ún de los más realistes.

Los relatos de Poe, primera amuesa definitoria del xéneru, o la serie de noveles y cuentos de Sherlock Holmes participen d’esti tipu de concepción (como los de Bustos Domecq). Quiciabes habría de ponese la tacha de ser enforma fríos, una acumulación de datos observables que’l protagonista sabe conxugar y encaxar a mou pa dar una desplicación bien razonable del sucesu y que’l llector pue contrastar coles propies hipótesis; de poco en poco, el llector va siendo quien a desentrellizar los casos que se-y planteguen, novela a novela.

Sicasí, esti plantegamientu va quedar escosu bien llueu y, buscando un redoble de tambor y el más difícil entá, Agatha Christie amaña les sos noveles rompiendo en munchos casos esti plantegamientu: yá nun prima esi pactu ente autor, personaxes y llector de dosificar la información a lo llargo de les noveles; yá nun hai una resolución lóxica y creíble, sinón más bien el relatu camuda nuna retafila de coincidencies que ruempen, por acumulación, col principiu de verosimilitú; cuido qu’en munches de les noveles d’Agatha Christie l’autora allampia por ablucar al llector d’estremaes maneres, quier ganar siempre magar que cometa, por usar una comparanza del mundu del fútbol, fuera de xuegu. El fuera de xuegu nun dexa de ser una falta qu’acaba sacando al llector, como diz el nome, del xuegu, del calter lúdicu de la novela policiaca, dexando nel cielu la boca esi tastiu agrín de quien se siente engañáu. Tres d’endientrase nun par de noveles d’Agatha Cristie, quien llee da en tener más desconfianza de los munchos embelecos que va dexando l’autora que del propiu asesín; Agatha Christie sacrifica’l pautu de lo policiaco embaeciendo al llector colos sos personales llucimientos y fueos d’artificiu.

Patricia Highsmith ye quién a da-y vuelta al xéneru y camuda’l focu, el puntu de mira: en bien de les sos noveles y relatos que podemos encartiar dientro del xéneru de lo policiaco, conozse de mano al criminal; ¿en qué consiste entós el suspense y el xuegu? En ver cómo’l círculu va estrenchándose al rodiu del protagonista, en ver cómo aquel crime que se camentaba perfeutu alcuentra una regalla pequeña pela que va furando la presión de les evidencies; el suspense highsmithiegu consiste neso: en nun esconder nada, en tenelo too a la vista (magar que dacuando en vez tamién seya oportuno señalar faltes y fueres de xuegu); en descubrir, n’atalantar qué erru pudo cometer el protagonista, cómo se vien abaxo la cadarma de la coartada.

Xusto convién fixase como esta función lúdica ye ún de los factores determinantes pa estremar el xéneru de lo policiaco de lo que puramente se conoz como novela negra. Na novela negra’l xuegu, lo lúdico, la recreación, queda arrequexao nun segundu planu. Como víemos, el xéneru policiacu yera’l más realista de los que parte de la crítica nomató como lliteratura de consumu, lliteratura popular o, cenciellamente —y col claru carís despeutivu de lo que consume «la inmensa mayoría»— sublliteratura. El tiempu acabó poniendo nel xustu valir esti tipu de lliteratura de xéneru que cuenta con unes riegles propies. Que daquién tan elitista como Borges defendiere’l xéneru policiacu ye preba d’ello.

Na llamada novela negra lo verdaderamente interesante yá nun ye xuegu y les riegles del mesmu, sinón que ye’l viaxe que se fae en cata del desenllaz, un viaxe nel que se van poner de manifiestu abondes de les desigualdaes sociales y de les contradicciones ya hipocresíes de la sociedá del momentu: la lliteratura rescampla asina una función arreparadora del mundu en cuantes que denuncia y ufre a los güeyos males de la sociedá, primer pasu na toma de conciencia pa intentar camudalos.