* * * * *
Segunda entrega del rellatu per capítulos ‘Enedina a medianueche’, fechu poles y polos autores de Radagast.
Dir a l’anterior

* * * * *

Quedó de pie mirando pa la almuada que garraba coles manes. Ella enxamás fuera una persona  violenta nin repunante, solo que tarrecía tener que falar con muncha xente. Entamara a cambiar cuando nun-y quedó d’otra que dir a vivir ellí y nun poder tar sola, pero nada al estremu de la tresformación de los últimos díes.

Taba cansada y nun podía más, y cada vez taba apretando más el rellenu de poca calidá de debaxo la funda. Llevantóse despacio de la cama y nun se preocupó de nun facer ruíu, la compañera taba como una tapia y ya podíen tar matando a daquién a la so vera que nun despertaba. Meyor pa ella.

Col so andar llentu y torpe, averóse hasta tener la cabeza d’aquella muyer lo suficientemente cerca pa que dexara de respirar. Nun paraba de roncar y notaba como-y xubía la tensión pol runfíu. Les voces nun facíen más qu’enfadala y calentala pa qu’algamara’l silenciu pol que tanto naguaba, nun paraben de da-y razones más que suficientes pa tomar la iniciativa ensin pensalo.

Viera cómo facelo una montonera de vegaes nes películes de Hollywood y naquelles telenoveles que tanto-y prestaben. Naquelles dómines nun yera a entender al villanu que mataba al probe inocente, pero agora tenía empatía con tolos malos viendo que cualquiera podía alloriar.

Garró con fuerza l’almuada y averóla despacín a la cara de la paisana y decatóse que namái entamara a apertar, nun había marcha atrás: o la mataba o la pillaben. Si consiguía que dexara de respirar ensin que ficiera ruíu dalu, namái diba tener que gritar pela mañana de que la compañera nun se movía. Unos llarimones de mentira y naide diba a investigar la muerte d’una vieya repudiada d’una residencia.

Enedina empuxó l’almuada contra la paisana, que nun paraba de mover les pates y los brazos tetando de garrar lo que nun la dexaba meter aire. Siguió faciendo entá más fuercia, hasta qu’escuchó unos pasos averase a la puerta. 

Continuará…